A grossi Sorch

Von Michael Schmidt

De Lang Sepp hot e grossi Sorch,
Die drickt sei arm Gewisse,
Es dauert net lang, do kummt de Storch,
Im Schnawwl hängt e weisses Kisse.
Un dodrinn leiht, ja was dann schun?
E klu un zapplich Wermche
Des bringt de Storch vun seinem Thrun.
Dort owe uff em Termche.

Nor u Frou losst em Sepp ku Ruh
Am Owend net und Morje:
Bringt er mir a  strammer Bu?
Odr muss ich mich noch sorje,
Dass es e Mädche werd, des Kind?
Des will mir net eileichte.

Es werd e Bu, ich glaab`s bestimmt,
E Bu, wie mer ihn brauchte.
Drum laadt de Sepp ins Wertshaus ein
Sei beschte Kumerade,
Dort trinke se a paar Gläser Wein,
Es Trinke kann net schade.

Un jeder an dem Tisch der saat:
Dei Soa soll lang, lang lewe!
Soll gross aa werre un recht braat,
Dodruff losst uns die Gläser hewe!
Sie trinke fescht bis in die Nacht,
Vun Mann zu Mann geht's Hebche,
Drhum, do hot de Storch gebracht,
Schun längscht e klunes Mädche.